قصيده لوفاة الرسول صلى الله عليه واله

لو غابت عن عينك عيني **** اتمنه الموت ايوافيني
ماريد الدنيه ابلياك
شلون احمل جمرة فركاك
_______________________
انه حيدر وحيدر تدري بطباعه
يبو الزهراء ما عافك ولا ساعه
خبر فكدك زماني اسمعته من ذاعه
يبلغني حبيبك اكصد وداعه
حسيت ابروحي اتغادرنني **** من جنت ابحجري اتودعني
انسه الروح وما انساك
شلون احمل جمرة بلواك
-------------------------
عاشت ذكرياتك بيه تدريني
طغل ربيتني وليه تباريني
ابعطفك وبحنانك من تغذيني
تريد اتروح هسه انته وتخليني
كل عمري وياك انه افنيته ***** وبحظنك حظن امي الكيته
للموت ارحل ريت اوياك
شلون احمل جمرة بلواك
-----------------------
المؤاخاه هالعمل من انته سويته
المهاجر ليه اخو انصاري خليته
وانه اتنطر اخو ليه تمنيته
كتلي ياعلي انته الي أخيته
عنك لو باجر سألوني **** ما املك بس دمع اعيوني
ويشرح عن لوعة بلواك
شلون احمل جمرة بلواك
---------------------
بفراش المنيه اتشوفك اعيوني
عليك اطفالي كل لحظه يسألوني
جدنه اشبيه يابويه ينادوني
من اسمع حجيهم والله ياذوني
لو ميت بفراشك أني ***** اهون لي ولا روحي اتعاني
بالروح وبالعمر افداك
شلون احمل جمرة فركاك
---------------------
اشعر بيك نفسي لا بعد أكثر
اعوفك ياحبيبي انه ما اكدر
الكل تعرف علاقة احمد ابحيدر
من اتروح اظل بعدك انه امحير
وحدك علام انته بروحي **** من ترحل تزداد اجروحي
هم اتظن اترك طرواك
شلون احمل جمرة فركاك
---------------------
الزمن مايوم مره والله لاواني
بس فكدك سهم يالهادي أذاني
العمر بعدك احسبه هالعمر فاني
ماريد الحياه بعدك تره أني
تعلم بالكوم أيأذوني **** وبفاطم والله ايفجعوني
اعليهه ايصب غيظه العاداك
شلون احمل جمرة فركاك
---------------------
تمت والحمد لله في 7/1/2013
خادم اهل البيت حيدر تركي الكربلائي

اللهم صل على محمد وال محمد
وعجل فرجهم واهلك اعدائهم يالله

» الرسول الاكرم (صلى الله عليه واله) سر من أسرار الله (عزوجل)
» استغفار الملائكة واستغفار الرسول صلى الله عليه واله
» كرامات ومعجزات ولادة الرسول محمد صل الله عليه واله وسلم